“ꀊꌱ꒧，ꉡꆹꉼꉹꋍꋓꐛꄉ，ꐥꍂꃅꑕꅽꉦꃀꇬꅑꄉ，ꆏꁳꅉꀕꃅꅽꉌꃀꇬꀖꅇꂷꉉꎻꑟꉂ。”——ꁱꂾꅇ
ꉡꆹꌤꃅꈭꐨꆏ，ꀊꉗꏢꃅꇓꈓꇬꐥꄉ，ꂵꆧꃀꆏꌤꃅꀋꆷꃛ，ꈊꃀꆏꐋꐊꎧꅝꎸꋠꇎꈭꐨꆏ，ꎧꑱꌕꃱꐚꆐꀋꉬꃅ，ꐋꀨꈧꌠꌋꆀꐮꈻꐯꎷꐯꅰꌊꑵꉙꑵꅉꇬꄉꑵꈩꁦꄮꇬꆏ，ꉡꆹꅉꀕꃅꎺꇁꀄꊭꄮꇬꅉꀕꃅꅲꇬꎷꌠꉼꉹꈧꌠꎺꇁꇬꎷ。ꄷꀋꁧꈊꃀꌊꁁꌙꈈꈇꄮꇬꆏ，ꋍꉔꋋꉔꆏꆀꃅꆈꌠꉼꉹꂾꃚꌒꈧꌠꇯꀄꂼꂻꐛꇁꅑꇬꎷꑴꌦ。
ꀋꃅꆸꈐꎺꇊꐝꄧꀕꃅ，ꉢꎺꄉꑴꌦ，ꀄꊭꃅꄉꄮꇬꆹ，ꉪꏤꁡꇤꏪꐦꑤꌩꇽꍔꃪꆈꐦꄂꋋꂷꇬꌺꃰꈧꌠꆹꉬꇮꃅꄲꏂꉼꉹꋩꇮꌐ，ꄚꈯꄔꇬꆏꉠꀉꄉꀉꈌꃴꇤꇨꋒꂶꌠꄉꀉꅰꃅꋩꉔ，ꂷꁻꉼꉹꆏꉠꀉꁌꀉꈌꃬꈐꂶꌠꀉꄂꇫꋩꇮ。ꅩꃰꈧꌠꆹꉬꇮꃅꉼꉹꂢꇮꈷꇮꌐ，ꄷꀋꁧꉠꀉꁧꀉꒉꀉꈌꀊꃴꏣꆧꂶꌠꄉꀉꅰꃅꂢꇮꂢꉔ，ꋋꆹꉼꉹꈍꑍꑵꃅꂢꇮ，ꑠꐛꅹꉪꏤꁡꇤꋋꂶꆹ，ꋍꃢꌞꊿꇱꌌꉼꉹꁡꇤꃅꂒꋉꄉꋺ。ꄚꀋꃅꀃꑍꋋꄮꐧꋦꀻꎆꐳꌠꌋꆀꃹꅼꃅꄺꀱꁉꃑꌠꇗꅉꊂꈹꄉ，ꄂꉈꏭꊋꃅꎆꎹꌠꃅꐪꇁꌊꉪꆀꃅꂿ꒧ꁡꇤꊐꈭꐨꆏ，ꊿꉼꉹꋩꌠꑌꋍꑍꋍꉙꃅꀁꑌꇁꀐ，ꃅꋊꂴꋎꌠ80ꈎꊬꌠꇬ，ꏪꐦꑤꊈ、ꑤꍔꃚꇱꌌꉼꉹꋩꌠꋂꂓꄉꌠꉠꃅꄷꆹ，ꀋꉊꂴꉼꉹꋩꇮꌠꊻꂷ600ꎖꑹꐥꌠꇬꄉꒊꅷꀃꑍꆏ10ꎖꑹꀉꄂꐥꀐ，ꆀꃅꆈꌠꉼꉹꋩꇮꇐꋋꐘꀋꃉꆏꑍꐜꀋꈨꇁꂯꄉꀐ，ꉪꊇꆹꈍꃅꑌꑓꉜꏿꄉꆀꃅꆈꌠꉼꉹꋩꇮꇐꁳꉪꊇꋋꋏꇇꄧꇬꄉꑍꁧꎻꄡꀋꑟ，ꑍꁧꎻꀋꉆꄡꑟꌠꉬ，ꆈꌠꉼꉹꆹꉪꊇꍡꉙꍡꌠꈂꀸꉬ，ꋋꆹꉪꊇꍔꃰꏽꌠꅏꊭꉬ。
ꀋꑍꊂꆷꃅꄟꐛꑠꑍꆏ，ꉈꃅꉪꊇꇁꌊꏪꐦꑤꌩꇽꍔꇬꇈꋂꇬꀀꌠ，ꉠꀑꑌꌺꌧꍧꌜꐥꇐꀋꉬꌠꁰꁱꍸꇐꐘꃆꂢꈷꌠꋩꋨꄻꇮꇐꑴꇐ（ꆈꌠꉼꉹꋨꄻꌠꇮꇐꑴꇐ）ꁧꎁꊪꊛꊿꂽꌋꆀꈬꌺꂶꌠꅱꁱꆹꀐ。ꂽꌋꆀꈬꌺꆹꌧꍧꌜꐥꇐꀋꉬꌠꁰꁱꍸꇐꐘꃆꂢꈷꌠꋨꄻꇮꇐꑴꇐ（ꆈꌠꉼꉹꋨꄻꌠꇮꇐꑴꇐ）ꁧꎁꊪꊛꊾꂷꉬ，ꋋꆹꐉꒆꃅꆈꌠꉼꉹꋨꄻꌠꇮꇐꑴꇐꋌꇱꊪꊛꌊꐺꌐꇈ，ꆈꌠꋊꃅꉼꉹꋨꄻꌠꇮꇐꑴꇐꐪꈴꃆꂮꑠꆹꉬꇮꋌꌧꌐꄉ，ꆃꎭꍏꆈꌠꉼꉹꋨꄻꌠꇮꇐꑴꇐꈐꏭꁧꏖꐨꀉꇨꃅꐥꐛꅹ，ꋋꆹꆃꎭꍏꆈꌠꉼꉹꋨꄻꌠꂓꅑꀨꇬꎍꂶꌠꐛꌠꉬ。
ꉼꉹꆹ，ꆈꌠꃅꄷꇮꃆꋽꇐꐋꀋꌡꌠꂢꇐꈷꇐꀄꊭꇈꉥꑣꌺꅍꊽꉌꃹꄷꀋꁧꌌꐺꌒꑠꑵꉬ。ꋍꅿꃚꂥꐨꀊꐯ，ꃚꌬꐨꃙꄧ，ꃙꐂꑖꑟꌺꅍꃚꈪꃚꐕꌒ，ꀊꂥꀁꂥꐳꀋꐳꐨꄉꄐꁦꉘꀕ，ꉪꇐꉂꏣꀉꑌꑵꃅꄜꅐꇁꄎꐛꅹ，ꆈꌠꏓꂱꀊꅰꃅꆈꌠꀕꆗꑮꆜꈧꌠꇫꉌꃹꇫꂿꉂ，ꋀꊇꊾꂷꌠꆏꉼꉹꋓꐥꌐꄉꏽ，ꑍꋓꌕꋓꃅꐥꑠꑌꌐꃅꌐꀋꉆꃅꐥꑵ。ꉼꉹꆹꂷꌌꄻꄉꑵꌋꆀꐯꌌꄻꄉꑠꑍꑵꐥ。ꂷꌌꄻꄉꑵꌠꆏ“ꂷꁻꉼꉹ”ꄷꉉ，ꋋꆹꊋꒉꌠꋍꀻꌠꌋꆀꑍꀻꌠꀉꄂꐥꑵ，ꀊꎴꐨꆏꊰꆀꂰꐥ，ꀊꐯꐨꆏꋍꆀꂰꅑꑍꆀꂰꑟꌠꐥ，ꀂꏾꆏꂱꏢꃅꄻꄉ，ꐛꏦꆏꑱꃀꀁꎴꏢꌡ；ꐯꌌꄻꄉꑵꌠꆏ“ꄲꏂꉼꉹ”ꄷꉉ，ꋋꆹꋍꀻꅑꉬꀻꌠꃅꐥ，ꄚꊋꒉꌠꆏꌕꀻꌠꌋꆀꇖꀻꌠꄉꀉꑌꃅꐥ，ꀊꎴꐨꆏꉬꆀꂰꅑꉆꆀꂰꐥ，ꀊꐯꐨꆏꋍꆀꂰꐛꌠꄈꊋꒉꃅꐥ。ꀒꁵꆏꂱꏢꃅꂶꏾꌡ，ꀋꃅꉼꉹꑵꌠꆹꀒꁵꆏꀒꅔꃅꄻꄉꌠꄈꀉꑌꃅꐥꀐ。
ꂷꁻꉼꉹꂾꃚꆹꀁꂥꇈꀋꄚꈍꇰꀕꁧꀕꉜꃺꑌꃅꐙ，ꄲꏂꉼꉹꂾꃚꆏꃙꄧꐝꉅꇈꃚꌬꐨꐯꀋꌡ，ꂱꑱꐛꑆꋦꌐ。ꉼꉹꂢꄮꆏ，ꂴꉼꉹꉐꆂꈧꌠꇴꄻꉺꄻꌊꊷꁈꅍꌡꃅꄉ，ꇇꇀꃼꁆꌠꆏꂪꀠꇬꌭꄉ，ꄻꂱꀯꏢꁮꇬꊙꄉ，ꊁꆏꇇꇀꑳꁆꌠꌌꀋꆏꃅꈷꇬꎷ，ꈁꐞꌌꋓꂡꏽꇈꂱꀯꐛꐈꐨꌋꆀꌗꂡꌗꊐꐨꐳꀋꐳꌠꌋꆀꃚꈪꃚꐕꃙꐂꄟꇬꉜꄉ，ꋍꇅꆏꀊꂥꌦꋍꇅꆏꀁꂥꌦ，ꐲꌦꀋꐳꌦ，ꑾꌙꌦꀉꇖꌦꃅꄙꐈꃪꐈ，ꁦꐡꇈꐡꊿꋌꁭꌦꄉꏽ。ꉼꉹꆹꀋꂢꄮꇬꆏꄻꉼꉹꑱꑳꇬꊐꄉ，ꉼꉹꑱꑳꆹꂷꌌꄻꄉꇈꋍꑞꋍꑵꈷꇬꄀꄉ，ꇐꑌꋽꎔ，ꃅꌤꑽꌤꐛꅹꉥꑣꌺꅍꊽꉌꃹꌦꄉꏽ，ꋋꆹꃅꋒꑽꋒꌠꇇ꒧ꋽꑵꉬ，ꀋꄸꄷꄩꀒꁵꍈꌠꇬꑟꃴꑟꅪꌌꎀꄉꌠꐧꃬꏢꄻꇬꄀꄉꇈꎔꃨꌠꑟꋧꃧꃨꑠꀮꆹꐒꇬꇯꄉꄻꉦꃀꇬꄀꄉꇬꆹꂯꊌꀋꉆꌠꋽꄻꅍꑠꋍꋬꈭꐛꌠꉬ。ꈊꃀꌙꈈꀕꀀꐚꀀꀋꐚꃅꄉꉼꉹꂾꃚꈨꇁꇬꆹ，ꀋꇊꆏꒈꏾꉸꀕꉷ、ꉌꊭꊨꀕꏯꀕꃅꂿꌠꌡ；ꉈꊿꃅꇫꉌꁠꌠꁯꎓꂾꃚꌡ；ꃬꊭꁱꐭꇁꌠꌡ；ꉈꑴꌧꈓꌥꈓꃅꑳꉨꌠꑌꌡ。ꑖꈈꀕꌠꃙꏦꃰꊿꉌꃀꋌꎼꁦꉘꀕ、ꅲꇢꈻꌦꄉꏽ；ꀋꄸꄷꑋꈌꄮꐰꃅꏸꏁꐷꀕꇈꁦꀑꇈꀑꌙꈈꀕ，ꁬꃨꅿꉗꌑꐩꀕꌠꈊꃀ，ꉼꉹꂢꎼꇁꇬꆹ，ꃀꅉꆐꊿꋌꎼꉌꐡꑓꐡ，ꎔꇁꃨꌠꐥꐨꊌꌠꏣ。
ꉌꂵꁏꄉꏣꃀꏣꑟꉁꄮꉼꉹꂢꎼꇁꇬꆹ，ꀊꅰꃅꊽꉌꐡꑓꁴꅐꄉꏽ；ꁦꀑꁮꆫ、ꌩꏓꒉꇸ、꒧ꃅꊖꑣꐙꄏꄉꉼꉹꂢꎼꇁꇬꆹ，ꋋꇅꃅ꒧ꃅꐙꄏꌠꑌꊿꋌꀋꎺꑟꃅ。ꆈꌠꀕꆗꑮꆜꉂꏣꄛꄮꇬ，ꉼꉹꂢꌠꆹꉂꄜꏡꁈꋍꉎꀋꐥꏢꉬ。ꑠꅹ，ꆈꌠꉂꏣꑵꉙꑵꇬ：“ꁦꀑꉒꐎꌌꇁꏣ；ꐦꐛꒉꀕꌌꏣ；ꃅꃴꃄꅉꌊꌋꌌꇁꏣ；ꀑꆗꀊꌱꉼꉹꌌꏣ。”“ꀿꅇꃀꅇꇉꄩꇪꀮꌌ；ꏣꅇꑟꅅꃅꃴꈭꏂꌌ；ꀑꆗꀊꌱꉂꏣꉼꉹꃬꋓꌌ”ꃅꑵꀕꉬꐛꅹ，ꉼꉹꂾꃚꉂꏣꐩ，ꉂꊿꈨꑲꆏ，ꉂꏣꃆꄔꐞꃅꐞ。ꐮꉌꃹꌠꀕꆗꑮꆜꑠꆹꉼꉹꌌꈁꁠꃅꌞꐯꁳꑵꉬꐛꅹ，ꆈꌠꉂꏣꑵꉙꑵꇬ：“ꀊꌱ꒧，ꉡꆹꉼꉹꋍꋓꐛꄉ，ꐥꍂꃅꑕꅽꉦꃀꇬꅑꄉ，ꆏꁳꅉꀕꃅꅽꉌꃀꇬꀖꅇꂷꉉꎻꑟꉂ。”ꀊꄶꅲꇢꈻꌠꉼꉹꂾꃚꈧꌠꆹ，ꀋꇊꆏꑋꆳꁏꇁꊽꈁꑓꇬꌸꌠꌡ，ꋋꆹꀋꆏꃅꊽꉌꂵꇬꄉꉌꃈꑓꌒꉼꉹꂾꃚꆏꋌꌌꄸꇙꌌꇙꉌꐡꑓꁴꅐ。ꋩꑍꑟꄹꉇꉼꉹꂾꃚꄈꀊꅰꃅꊽꉌꁠ。ꄔꊒꄹꉇꀑꆗꀊꌱꇁꉚꉂꏣꑵꉙꑵꇬ：“ꍵꆳꈺꌋꀕ，ꌨꏾꇓꏾꏁꏪꀕ，ꀊꌱꇁꉚꑓꏣꈘ，ꋍꈓꋍꃢꆀꃆꄔꊒꑟꇁꃲ，ꉼꉹꌕꋓꂢꆸꐔꀐꇬꑌ，ꀊꌱꆎꆹꑞꐛꅹꃅꀋꇁꇆ！”
ꐩꋊꄘꎖꈎꐥꌠꆈꌠꉼꉹꋌꑵ，ꌠꆗꑮꆜꉂꏣꉂꑟꈍꑋꋌꇱꂢꁖꇁꄉ，ꀊꌱꈍꑋꉌꃀꋌꎼꍠꄹꇙꀋꐚ。ꉼꉹꆹꌌꉂꐪꉂꑟꄜꉆꐛꅹ，ꉼꉹꆹꉪꆈꌠꏓꂱꌌꉂꐪꁰꁱꌐꂷꃅꄉꌠꉬ，ꄷꀋꁧꆈꌠꍔꄅꊋꃤꌋꆀꀑꇬꐪꊛꄐꊋꑌꐥꌠꉬ，ꋋꆹꆈꌠꉼꉹꀑꐱꃆꂮꉉꀽꌠꉬ。ꉼꉹꆹꆈꌠꌧꇐꁰꁱꈐꏭꇬꍸꇐꀋꂿꑘꑵꉬ，ꆈꌠꐥꅷꇿꑟꄷꆏ，ꉼꉹꑌꐥꅷꇿꑟꌠꉬ，ꃅꈎꃅꆪꆹꑠꃅꈳꅐꁧꑴꇬ，ꄚꉼꉹꆹꄡꇗꁮꀋꐭꌗꀋꅐꃅꆈꌠꏓꂱꐊꅷꇁꌠꉬ，ꋋꆹꃰꊿꉌꃀꈐꏭꐩꌠꉬꄿꂿ，ꌒꌠꉬꄿꂿ，ꉬꇮꃅꋋꇱꂢꈷꁖꇁꄎꄉ，ꆈꌠꂢꇐꈷꇐꀋꉬꀋꉆꑠꑵꐛꇫꎍꀐ，ꋋꆹꉈꑴꊿꋅꐛꑆꋦꌠꅑꃚꅑꅺꑵꑌꉬꐛꅹ，ꆈꌠꏓꂱꉂꐪꁰꁱꌐꂷꑵꑌꉬ。ꈍꄮꇬꉫꄿꂿ，ꂱꑱꃅꄷꈍꎳꃅꇢꄿꂾ，ꉼꉹꂾꃚꌒꌠꃅꍜꆹ，ꆈꌠꒌꆠꏟꈯꀕꃅꋌꌭꄉꇬꎷꌠꉬ。
ꉂꇂꅉꌠꆀꃅꆈꌠꉼꉹꇆ，ꈀꄸꂷꉪꊈꎁꃅꈝꃀꈢꄉꀋꆏꃅ，ꉪꄝꆘꅝꇬꎷꌠꒌꆠꌋꆀꅏꈌꋌꉅꐮꇰꄉꇬꎷꌠꉬ？ꈀꄸꂷꉪꊈꎁꃅꀊꄶꐰꇑꈐꉘꈜꇬꆹꌠ，ꈝꃀꂁꄉꏡꌠꋌꁉꎼꇁꌠꉬ？ꀅꌳꌺꃅꌭꄉꑲꆏ，ꉪꊇꉌꃀꆹꅉꀕꃅꉂꏣꊷꆣꀕꌠꐛꂨꀕꃅꀀꇬꎷꌠꉬ。ꇯꍝꃅꉢꑇꑴꇆ，ꀊꄶꁧꇁꇉꈽꃨꌠꂙꃨꀊꋨꈨꆹ，ꉼꉹꂾꃚꌒꌠꐊꄉꃨꇁꌠꉬ，ꑠꃅꋋꀮꇬꄉꃨꅷꀊꋨꀮꇬꑟ，ꀊꋨꀮꇬꄉꃨꅷꋋꀮꇬꑟ，ꋍꀮꇈꋍꀮꄹꃨꅷꁧꇬꎷ；ꋋꆹꉢꁦꀮꂷꈁꐛꅉꃅꌺꃰꈧꌠꅿꃷꅍꆊꑌꌋꆀꌦꐳꌌꉘꒆꄉꌠꑇꌠꌡꃅꉢꑇ，ꁦꀮꂷꈁꐛꅉꃅꒊꌋꀕꇈꉧꑳꀕꄉꈁꉜꊽꉌꐡꇗꈪꊰꇬꎷꑠꑵꉬꐛꅹ，ꅩꃰꈧꌠꆹꊨꏦꉌꋬꈬꐛꃅꀊꄶꇬꀀꆹꏾꇬꎷꌠ，ꆗꑍꂙꃨꌡꌠꇬꄉꅑꅸꃀꌠꀑꐎꐍꎭꎬꄮꇬꑟꌠꃅꉌꆐꆹꀋꅑ、ꑓꆐꆹꀋꋠꇬꎷꌠꉬ。ꑠꅹ，ꅉꀕꃅꉼꉹꂾꃚꌒꌠꀄꂼꂻꐛꇁꇬꎷꐛꅹ，ꆀꃅꉂꏣꆹꅉꀕꃅꉼꉹꐊꄉꋌꌌꊷꆣꀕꇬꎷ！ 
