彝文散文诗《孤寂的人生》ꊿꐥꋍꍂꉌꌤꅸꈢꋒ海来•木呷瓦苦ꉊꆽꃅꇢ•ꃬꈐ

    海来木呷.瓦库（1960年10月-   ），男，彝族，四川喜德人，四川省委党校研究生部经济学专业脱产研究生班毕业，研究生学历，管理学学士，四川省作家协会会员，曾任凉山州人大常委会副主任、一级巡视员，现任凉山州彝学学会会长。

ꊿꐥꋍꍂꉌꌤꅸꈢꋒ

ꉊꆽꃅꇢ.ꃬꈐ ꁱꌠ

01

ꊿꐥꋍꍂꌠꆏꒈꂡꌟꃅꐙ,

ꌕꈪꀕꇈꌕꍬꀕ,

ꌕꀱꀕꇈꌕꍅꀕ;

ꌩꄹꏢꒉꌌꒉꌠꑌꀋꇊꌡ,

ꌕꁏꒉꃴꃹ,ꌕꁏꒉꄩꅐ。

ꃋꉩꃋꊸꋪ，ꂄꌠꄸꌠꉔ。

ꇿꈨꑌꊾꋒ,ꐒꈨꑌꊾꋒ;

ꒇꈨꑌꊾꊝ,ꐜꈨꑌꊾꊝ；

ꌒꌠꑌꊿꊌ，ꎭꌠꑌꊿꊌ。

ꄚꂄꌠꆏꊿꋌꎺꀋꄐ，

ꄸꌠꊿꎺꅲ。

ꐤꄮꇬꆏꁌꒉꑲꀋꌧ，

ꈢꋒꈭꐨꑲꆀꉌꆐꅑ。

ꉌꇿꂾꌕꑍ，

ꉌꐒꆏꋍꍂ。

ꌒꌟꃅꐛꌠꆹꑲꇤꅝꉗ，

ꎭꌟꃅꐛꌠꆹꐥꍂ。

ꊿꐥꋍꍂꌠ，

ꀋꇎꌟꃅꐛꅷꄉꐱꁍ；

ꉌꌤꌟꃅꐙꅷꄉꈢꋒ。

02

ꎹꄓꈧꅐꈊꇁꉘꀋꇉ,

ꄚꀉꂿꆗꄿꀋꋓꀋꉪꃀꅜꃲ,

ꃅꍵꄮꐰꈿꐔꃨꅑꃨꊰꃲ；

ꃅꋆꃹꊂꀠꆿꏾꅑꏾꆴꃲ。

ꄚꃀꌠꈎꈤꒉꌠꆹ,

ꃪꄧꇓꂃꄓꌠꌟꃅꅉꁮꋌꌫꄉꀋꄐ；

ꁯꋒꌐꒉꏮꌠꌟꃅꅉꎹꋌꇈꄉꀋꄐ。

ꏢꐎꇁꄿ①ꄇꆹꀊꊛ②ꃀꆏꇇꑭꏯꇊꀕ，

ꀊꈲꅔꄧ③ꇌꎶꃘꑴ④ꃀꆏꃚꊨꈤ；

ꃆꉺꉘꁌ⑤ꒀꈨꉏꐞ⑥ꃀꆏꂾꃚꊰ，

ꏉꊂꇉꂾ⑦ꈌꃋꀟꃨ⑧ꃀꆏꅳꁖꇰ。

ꃪꄧꀂꏾ⑨ꌩꃀꇪꉾꀕ，

ꀊꂮꇓꈓ⑩ꇓꃀꆈꄂꀕ；

ꃪꈜꏦꃴ⑪ꊿꂾꈛꁧꑋꍈꏁꊤꀕꀐꂼ,

ꊿꄙꊿꉐꄚꈴꐺꇬꑌ,

ꀉꁌꉌꌤꆺꇴꀕꌠꋌꉨꐛꂷꇬꀋꐊ！

03

ꀉꂿꃅꇢꆗꃅꋍꑍꆹ，

ꃅꈬꏬꆉꌟꃅꅐꍔꂪꍒꃅꃴꃰ,

ꁧꇂꇉꄩꐂ,ꃄꇖꄹꊂꏹ。

ꄚꇖꊩꄟꃀꉈꊪꆹꐉꀋꊌꇁꇬꆏ,

ꈭꄂꉌꆽꌃꂷꌟꃅꉌꌤꇁꇬꉌꂵꌃꇗꏿ！

04

ꀉꂿꌻꑘꐭꃅꋍꑍꆹ，

ꑿꅸꃅꉒꀱꍠꀕꌠꋧꏂꉘꁌ⑫ꁧꇬꆫ，

ꇌꅸꌕꈪꌕꍬꀕꌠꅙꇉꒈꇤ⑬ꍤꁆꅶꁉꏪ;

ꃮꅸꁬꋒꅾꉘꀕꌠꒉꊩꃅꐦꄂ⑭ꊫꇬꂇ，

ꄚꀊꉘꆫꐋꀋꊌꃅꄉꉌꌤꇁꑠꑵ,

ꍱꏢꉀꇁꉌꂵꀂꏽꋉꌠꌟꃅꉌꅛꐯꉌꅛ。

05

ꌩꒆꑌꑟꁦ,

ꂶꒆꑌꑟꁦ。

ꄚꃰꊿꉌꃀꋋꂷꆹꑞꅉꊫꅉꐘꀋꈨ，

ꀋꁮꇉꉱ⑮ꌟꃅꊾꂷꑓꀋꃰꅉꐥꇬꆏ,

ꊾꂷꇫꅐꇀꑟꉂ;

ꎮꉰꇓꈓ⑯ꌟꃅꊿꋧꑳꈽꅉꑠꐥꇬꆏ,

ꊾꂷꀋꂿꃅꄉꌙꈈꈇꅉꑠꈚꐤꑟꉂ。

06

ꊿꐥꋍꍂꉌꌤꅷꈢꋒ,

ꄚꃰꊿꉌꌤꄮꇬꉌꃀꑋꄟꐯꀋꌡ。

ꃰꊿꋍꈨꋋꈨꉌꌤꇬꆏꉌꂵꂶꌠꐚꍝꐙꃰꏿ,

ꑾꎭꀕꁱꈀꏮꆳꌌꉒꐊꁧꄩꃰꄉꀑꃀꌦ,

ꉐꐊꇉꅶꏣꄉꈭꃰꌦ;

ꋍꉌꋍꐚꐙꌠꐥ。

ꄚꃰꊿꋍꈨꋋꈨꉌꌤꇁꇬꉌꑘꒃ,

ꉌꂵꇓꆈꀋꃀꌟꃅꅡꊪꀕ,

ꁧꐙꌟꃅꒊꌋꀕ，

ꎿꃀꌟꃅꐼꇉꀕ,

ꋍꒌꋋꐊꐺ,ꋍꉌꋍꐋꐛ,

ꀠꄂꉒꇆꄂꄷꑌ,ꈁꒉꈁꌒꀕꌠꐥ。

ꊿꐥꋍꍂꑠꑵꑌ……

2024ꈎ12 ꆪ ꀒꎂ

ꉉꋊꈺꀽ:

① ꏢꐎꇁꄿ：ꃄꂓꋌꈚꆹꏪꐦꑤꏢꐎꑣꇬꐛ,ꀊꆨꆃꎭꆈꌠꐩꋊꇬꏢꐎꋌꈚꃆꇭꃅꃨꂓꅑꌠꅐꑠꈚꉬꄉ,ꆈꌠꇌꀳꇬ“ꃆꇭꏢꐎꅐ……”ꄷꑠꃅꉉ。

②ꄇꆹꀊꊛ：ꀊꆨꆃꎭꆈꌠꐩꋊꇬꃆꇭꂓꅑꈴꑠꂷꂓ。

③ꀊꈲꅔꄧ：ꃄꂓꈚ,ꒊꆈꌜꏨꄵꃋꈯꏃ(ꏪꄫꏃ)ꇬꐛꄷꉉ。

④ꇌꎶꃘꑴ：ꀊꆨꆃꎭꆈꌠꐩꋊꇬꇌꂓꅑꑠꏢꂓ,ꇌꋋꏢꆹꌦꇌꌊꇌꏭꃅꐛꏢꉬꄷꉉꌠ。

⑤ ꃆꉺꉘꁌ：ꁦꂷꂓ,ꁧꋋꂷꆹꏪꐦꇓꈓꑳꄩꐛ。

⑥ꒀꈨꉏꐞ：ꀊꆨꆃꎭꆈꌠꐩꋊꇬꑿꂓꅑꑠꂷꂓ,ꑿꋋꂷꆹꉐꆂꑍꐞꑠꂷꉬꄉꒀꈨꉏꐞꂓꌠ,ꂾꃚꆏꃆꉺꉘꁌꉆꄉꂿꇬꉔꈯꏦꑳꈧꂷꉬꄷꑠꃅꉉ。

⑦ꏉꊂꇉꂾ：ꃄꂓꋌꈚꆹꏪꐦꑤꏉꊂꑣꇬꐛ,ꀊꆨꆃꎭꆈꌠꐩꋊꇬꈌꃨꂓꅑꑠꄚꇬꅐꋺ。

⑧ꈌꃋꀟꃨ：ꀊꆨꆃꎭꆈꌠꐩꋊꇬꈌꃨꑌꈹꉆꈹꂓꅑꑠꂷꂓ。

⑨ꃪꄧꀂꏾ、⑩ꀊꂮꇓꈓ、⑪ ꃪꈜꏦꃴ、⑫ꋧꏂꉘꁌ、⑬ꅙꇉꒈꇤ、⑭ꒉꊩꃅꐦꄂ：ꃄꂓ、ꁦꂓ、ꒈꇤꂓꋋꃘꈚꆹꉬꇮꃅꑡꅇꑤꅾꊪꑣꇉꆼꈘꋂꇬꐛ。

⑮ꀋꁮꇉꉱ：ꃄꂓꋌꈚꆹꐱꆹꀭꄮꑤꆿꈤꑣꀋꁮꇉꉱꋂꇬꐛ。

⑯ꎮꉰꇓꈓ：ꋋꆹꍏꇩꍞꑤꏃꑠꂷ,ꍏꇩꁰꅐꁆꏯꍤꏦꒊꃀꂠꌠꎿꃀꇬꈿꒉꅉꇬꐛ。

ꁱꊿꄛꑣ:

ꉊꆽꃅꇢ.ꃬꈐ（1960ꈎ10ꆨ-   ），ꑝꅇꑤꅾꊏꑣꇉꆼꈘꋂꇬꀀꌠ，ꆃꎭꍏꅉꀕꌤꏲꊈꑼꉼꃛꍗꏓ、ꑴꏹꑦꏃꑼꄻꋺ，ꀋꃋꆹꆃꎭꍏꆀꇐꎥꈉꇬꉼꍈꄻꄉ。